O Noia Harp Fest despide hoxe a súa 12ª edición cun dos momentos máis esperados da programación: a Gala de Entrega do III Premio Internacional de Composición Portus Apostoli, que se celebra a partir das 20.30 horas no Teatro Coliseo Noela. O concerto inclúe a estrea mundial de dúas obras inéditas para arpa e orquestra: Cuatro historias gallegas, do compositor arxentino Federico Beilinson, e Folías celtas, do uruguaio afincado na Coruña Gabriel Bussi.

Ambas creacións soan por primeira vez esta noite da man da Real Filharmonía de Galicia, dirixida por Sebastian Zinca, e co acompañamento das arpistas Claudia Besné —que regresa ao festival tras o seu paso en 2023— e Francesca Romana Di Nicola.

Música contemporánea e grandes clásicos franceses

A gala desta noite compleméntase cun repertorio de clásicos universais asinados por Claude Debussy e Maurice Ravel, convertendo o evento nunha experiencia musical que fusiona creación contemporánea e patrimonio sonoro do século XX.

No público estarán presentes os propios compositores premiados, así como representantes institucionais do Concello de Noia, da Deputación da Coruña e da Xunta de Galicia. As últimas entradas para asistir ao concerto aínda están dispoñibles na plataforma Ataquilla.com.

Un festival único no noroeste peninsular

Con esta gala, o Noia Harp Fest pecha unha edición que durante cinco días reuniu trece actuacións musicais e figuras recoñecidas da arpa a nivel galego e internacional, como Ana Crismán, Bleuenn Le Friec, Kevin Le Pennec, Quico Comesaña ou Rebecca Hill. O certame, que vertebra toda a súa programación arredor da arpa, consolídase como un evento singular en todo o noroeste peninsular.

O Premio Internacional de Composición Portus Apostoli, impulsado polo festival e polo Concello de Noia, busca ampliar o repertorio para arpa e orquestra, promovendo novas creacións desde Galicia para o mundo. A súa cuarta edición está xa en marcha e recibe partituras ata decembro de 2025.