Santiago de Compostela renderá homenaxe este sábado, 14 de xuño, a Xosé Manuel Beiras, recoñecéndoo como autor destacado na XXXI edición do acto homenaxe "O Escritor na súa Terra’, promovido pola Asociación de Escritoras e Escritores en Lingua Galega (AELG) en colaboración co Concello de Santiago.

A xornada comezará ás 11:30 horas no parque de Galeras, onde terá lugar o descubrimento dun monólito conmemorativo e a plantación dun teixo, árbore simbólica escollida polo propio homenaxeado. O acto contará coa participación da alcaldesa de Santiago, Goretti Sanmartín, xunto ao presidente da AELG, Cesáreo Sánchez, e o propio Beiras.

Un recoñecemento á traxectoria literaria

A celebración continuará ás 12:30 horas no Centro Galego de Arte Contemporánea (CGAC), onde se realizará a entrega da “Letra E”, unha peza escultórica elaborada polo artista Silverio Rivas, que simboliza o recoñecemento á traxectoria literaria do homenaxeado. O acto incluirá unha laudatio a cargo de Miguel Anxo Fernán-Vello e contará coas intervencións da vicepresidenta da AELG, Beatriz Maceda Abeleira, ademais da alcaldesa e o presidente da entidade.

A iniciativa, que se consolidou ao longo de tres décadas, pretende estreitar o vínculo entre o autor e a súa terra, poñendo en valor a súa obra nunha celebración popular e próxima. Neste caso, recoñécese a relevante achega de Beiras ao ensaio e á tradución, ámbitos que completan unha dilatada traxectoria intelectual e política.