O director de Turismo de Galicia, Xosé Merelles, asistiu este sábado ao desfile de Entroidos Tradicionais en Santiago de Compostela. A cita congregou máis de 400 participantes que, partindo da praza do Obradoiro, percorreron algunhas das principais rúas da zona vella da capital galega.

Xosé Merelles salientou que a cita quere confirmar a imaxe de Galicia como destino experiencial, que pode ser desfrutado durante todo o ano. Neste sentido, Merelles destacou como “o Entroido supón un importante aporte na singularización da oferta turística da comunidade” e incidiu no aporte na desestacionalización do destino, ao celebrarse en época de tempada baixa. Tamén abundou na diversificación territorial que promove, por ser unha festividade de gran tradición en contornas rurais.

En total, participaron 17 entroidos de toda Galicia, entre eles cinco recoñecidos como Festa de Interese Turístico de distintos niveis. Son o Entroido de Xinzo de Limia, que ten a categoría internacional; os de Verín e Viana do Bolo, co recoñecemento nacional -este último desde xullo de 2025-; e o Entroido de Cobres e Os Xenerais do Ulla, de interese turístico galego.

A maiores, púidose ver no desfile a representantes das Bonitas de Sande (Cartelle), os Vellaróns de Riós, o Entroido de Samede (Paderne), os Felos e Madamas de Esgos, os Galos da Mezquita (A Merca), os Follateiros de Lobios, as Madamitas e Madamitos de Entrimo, o Touro e Xigante de Celavente (O Bolo), o Fulión de Buxán, o Entroido de Salceda de Caselas, o Entroido de Mugares (Toén) e os Cabreiros de Muiños.

Desde marzo deste ano, o carnaval goza en Galicia do recoñecemento como Ben de Interese Cultural no seu conxunto, cunha importante aportación ao patrimonio inmaterial. Destaca a importancia das máscaras como un elemento entroidístico característico, así como o vínculo coa gastronomía.