O Concello de Ames celebrou esta semana a recepción oficial dos oito nenos e nenas saharauís que pasaron o verán con familias do municipio dentro do programa Vacacións en Paz, impulsado pola Asociación Solidariedade Galega co Pobo Saharauí (SOGAPS).

Durante o acto no salón de plenos da Casa do Concello, os menores e as súas familias de acollida foron recibidos polo alcalde de Ames, Blas García, a concelleira de Benestar Social, Uxía García, o técnico de integración social Leo Pena e representantes de todos os grupos municipais.

Un programa con longa tradición

O rexedor destacou a continuidade do apoio municipal a este proxecto: “O labor que fan as familias de acollida é vital para estes rapaces e rapazas. O Concello de Ames leva colaborando moitos anos neste programa, independentemente da cor política, e imos seguir facéndoo, incluso en maior medida”.

Pola súa banda, Uxía García, tamén familia acolledora, agradeceu “o esforzo das familias participantes, porque a súa implicación é fundamental para que Vacacións en Paz poida realizarse ano tras ano”.

A voceira de SOGAPS na comarca, Esther Ybarra, explicou que neste verán son 305 os menores acollidos en Galicia, a maioría repetidores, o que facilita a súa adaptación. “Aquí podemos ofrecerlles moitas cousas boas, pero non podemos substituír ás súas familias. Mentres o Sáhara non sexa libre, SOGAPS seguirá traballando para darlles un verán libre”, engadiu.

Experiencia enriquecedora

Os oito menores –catro nenas (Duaa, Fadala, Zaina e Mariam) e catro nenos (Jalihena, Hadi, Mohamed e Laraibi)– repetiron experiencia en Ames, salvo unha nena que foi acollida por primeira vez. As familias subliñaron que participar neste programa é “unha experiencia marabillosa e enriquecedora, que nos axuda a valorar máis o que temos e a ser persoas máis solidarias”.

Ademais de desfrutar dun verán afastado das altas temperaturas do deserto, os rapaces tiveron oportunidade de realizar revisións médicas, aprender galego e castelán e participar en diversas actividades culturais e de lecer. Para despedilos, recibiron tamén mochilas con material escolar.

O Concello de Ames colaborou un ano máis coa iniciativa sufragando o custo dos billetes de avión dos menores, reforzando así o seu compromiso cun programa que leva máis de vinte anos desenvolvéndose en Galicia.