A produtora compostelá Work on Sunday, organizadora do WOS Festival, presentará do 11 ao 14 de setembro en Santiago o proxecto 'Amplificando a memoria', unha proposta multidisciplinar que busca preservar e reactivar o patrimonio sonoro galego a través da recuperación do Organsound, un altofalante deseñado polos irmáns Portela Seijo en 1972.

A iniciativa, que conta co apoio da Deputación da Coruña, o Concello de Santiago, a Universidade de Santiago de Compostela e Afundación, ofrecerá unha instalación sonora aberta ao público na Sede Afundación, acompañada de accións divulgativas e participación cidadá.

Memoria, emoción e reflexión colectiva

Segundo explicou a directora do proxecto, Acacia Ojea, a proposta pretende ir máis alá da recuperación técnica dun obxecto singular: “Amplificar non só alude ao dispositivo técnico, senón tamén á acción simbólica de ampliar a nosa capacidade de escoitar, lembrar, sentir e comprender, e de poder transmitir este patrimonio á xente nova, activando a escoita consciente como ferramenta de coñecemento, reflexión e encontro”.

A programación inclúe unha instalación sonora elaborada polo artista multidisciplinar Xoán-Xil López, un panel de pensamento que contextualizará o papel do Organsound na historia da innovación acústica e tres sesións de escoita colectivas comisariadas por selectores locais e internacionais.

Patrimonio galego en clave contemporánea

Con esta iniciativa, Work on Sunday procura conectar xeracións a través da memoria sonora, unindo investigación histórica, tecnoloxía e creación artística contemporánea. O proxecto busca tamén fomentar unha escoita atenta e compartida, como antídoto fronte á hiperestimulación dos tempos actuais.

Amplificando a memoria poderase visitar de xeito gratuíto entre o 11 e o 14 de setembro, en paralelo á oitava edición do WOS Festival x SON Estrella Galicia, consolidando a Compostela como escenario para a experimentación artística e a reflexión cultural.