O Concello de Ames volve a poñer sobre a mesa a necesidade de mellorar a liña de autobús de interese municipal (SIMU). Esta mañá, o alcalde, Blas García, o concelleiro de Mobilidade, Víctor Fernández, a directora xeral de Mobilidade da Xunta de Galicia, Judit Fontela, e o presidente de Monbus, Raúl López, reuníronse para analizar as problemáticas detectadas polos usuarios e buscar solucións.

O encontro responde ao alto número de queixas recibidas por parte da veciñanza, que demanda unha mellor xestión do servizo, con máis garantías no cumprimento de horarios e percorridos. Ademais, o Concello aposta por modificar o trazado da liña para incluír novas paradas en puntos estratéxicos como o Hospital Clínico, o Campus Sur da Universidade de Santiago de Compostela, Fraíz e A Moniña, na parroquia de Biduído.

O servizo SIMU foi creado en xuño de 2022 mediante un convenio entre a Xunta de Galicia e o Concello de Ames, coa finalidade de conectar as parroquias de Ortoño, Bugallido e Biduído con Santiago de Compostela. Esta liña xurdiu para paliar a desaparición da liña urbana P2, pero dende entón acumula queixas sobre a súa operatividade.

Blas García manifestou que “a nosa prioridade é garantir un servizo de calidade, adaptado ás necesidades reais da cidadanía. A incorporación de novas paradas e o control dos horarios son pasos fundamentais para que a veciñanza confíe neste transporte e o utilice”.

O Concello de Ames agarda que esta reunión sexa un punto de inflexión para conseguir unha reformulación eficaz do servizo, facendo del unha alternativa real para a mobilidade no municipio.