O club santiagués Viravolta iniciou a tempada con éxito no IV Torneo Cidade de Lugo, onde as súas ximnastas demostraron o seu talento sobre o tapiz. O equipo Benxamín M Escolar logrou unha brillante medalla de prata, un resultado que pon en valor o esforzo e a preparación das deportistas.

O torneo, organizado polo club Gravitty Lugo, serviu como primeira toma de contacto competitiva para os equipos das categorías escolar e promoción de Viravolta. Ademais da prata das benxamíns, o club compostelán tamén celebrou grandes actuacións doutras categorías, como Cadete Escolar, Alevín M Escolar, Juvenil Escolar, Alevín P Escolar e Benxamín P Escolar, que acadaron excelentes resultados.

Éxito no Campionato Galego Individual Base

O pasado fin de semana, Viravolta tamén destacou no Campionato Galego Base Individual, celebrado en Sanxenxo. O ximnasta Daniel Rey proclamouse subcampión galego na súa categoría, acadando a medalla de prata. Pola súa banda, Ainara Miramontes quedou ás portas do podio cunha excelente cuarta posición, mentres que Ximena Vilela, en categoría cadete 2010, conseguiu un meritorio quinto posto.

Ademais destes grandes resultados, Alba Varela (8ª), Mariña López (9ª) e Nuria García (11ª) completaron unha destacada participación. O bo desempeño de todos eles permitiulles conseguir a clasificación para o campionato nacional, un importante logro para o club.

Próxima cita en Santiago

Tras estas dúas fins de semana de competición, Viravolta xa ten a vista posta no próximo desafío: o V Torneo Nacional Viravolta Santiago, que se celebrará a vindeira fin de semana. O club convida a toda a afección a achegarse para gozar do espectáculo da ximnasia rítmica e apoiar ás súas ximnastas.