A escola itinerante de baile tradicional Seisporoito prepara o inicio do curso 2025/26 cunha oferta ampliada de 350 prazas e a apertura de aulas en Santiago de Compostela, que se suma a unha rede que xa abrangue diversas localidades de Galicia, ademais de Madrid e Barcelona.

No último curso, Seisporoito formou a 270 persoas de todas as idades, que atoparon no baile galego un espazo de aprendizaxe, expresión e encontro cultural. O proxecto está dirixido polo docente, coreógrafo e director artístico Artur Puga, quen subliña que o obxectivo non é só ensinar pasos, senón facer comunidade arredor da cultura galega, combinando profesionalización, goce e tradición.

Filosofía e método

O nome da escola fai referencia ao compás da muiñeira (6/8) e defínese como un espazo aberto a diferentes perfís de experiencia, desde iniciación ata aulas orientadas a mestrado e profesionais da danza. A metodoloxía de Puga destaca por ser fresca, participativa e centrada no divertimento, situando ao alumnado no centro do proceso formativo.

Artur Puga conta cunha dilatada traxectoria como intérprete e formador. Colaborou con artistas como Tanxugueiras —formou parte do seu corpo de baile no Benidorm Fest—, Mondra, Xabier Díaz ou Fran Sieira, e exerceu como director artístico en producións como Dous Mundos (2022).

Un proxecto en expansión

A partir do 1 de outubro, Seisporoito levará as súas aulas a Ourense, Allariz, Xinzo de Limia, A Gudiña, Verín, Laza, Salceda de Caselas, Vigo —que incrementa prazas— e Santiago de Compostela.

O proxecto tamén reforza o vínculo coa diáspora galega mediante sesións mensuais en Madrid e Barcelona, que permiten ao alumnado manter o contacto coa tradición e vivir a cultura desde a distancia.

O prazo de inscrición xa está aberto a través do formulario dispoñible na web da escola.