A Orquestra e Coro da Universidade de Santiago de Compostela (OCUSC) abre o prazo de inscrición para participar no seu Encontro de Verán 2025, unha proposta formativa e artística que terá lugar entre os días 21 e 27 de xullo na capital galega. A convocatoria, organizada pola Área de Cultura da USC, está aberta a estudantes de música de toda España, Portugal e outros países da Unión Europea, e permanecerá activa ata o 7 de xullo ás 23.59 horas.

Un proxecto conxunto por primeira vez

Por primeira vez, o Encontro de Verán convoca de forma conxunta prazas para a Orquestra e para o Coro da USC, consolidando unha proposta musical coral e orquestral de alto nivel. Durante unha semana, as persoas participantes traballarán da man de recoñecidos profesionais do ámbito musical, combinando ensaios intensivos con concertos públicos, nun ambiente de convivencia, formación e excelencia artística.

A convocatoria está dirixida tanto a membros actuais da OCUSC como a outras persoas que cumpran os seguintes requisitos:

• Para a orquestra: estudantes de 3º ciclo de grao profesional, grao superior ou persoas que acrediten nivel equivalente.
• Para o coro: persoas con experiencia previa en agrupacións corais.

Inscricións, instrumentos e aloxamento

O prazo de inscrición estará aberto ata o 7 de xullo, e as persoas interesadas deberán cubrir un formulario online. Os instrumentos admitidos para a orquestra son: violín, viola, violonchelo, contrabaixo, frauta, óboe, clarinete, fagot, trompa, trompeta, trombón, tuba, arpa e percusión. No caso do coro, aceptaranse voces de soprano, mezzosoprano ou alto, tenor ou barítono, e baixo.

Ademais, a USC ofrecerá aloxamento gratuíto na residencia universitaria para as persoas que o soliciten e non residan en Santiago, desde a noite do 20 ata a noite do 27 de xullo. As prazas son limitadas e asignaranse por orde de inscrición.