Este martes, 24 de xuño, Santiago de Compostela vivirá unha intensa tarde cultural con dúas propostas organizadas polo Consorcio de Santiago en dous espazos emblemáticos da cidade: a Casa do Cabido e o Museo do Pobo Galego.

Pintura en directo con Mareiras na Casa do Cabido

Entre as 18.00 e as 20.00 horas, a artista compostelá Mareiras levará a cabo unha acción pictórica en directo nas dependencias da Casa do Cabido, situada na Praza de Praterías. Durante dúas horas, pintará a un modelo ao vivo, nun exercicio de creación que forma parte da exposición “Tras a pegada das musas”, unha mostra comisariada polo Consorcio de Santiago e de acceso de balde.

A iniciativa busca visibilizar o proceso creativo e pór en diálogo a creación contemporánea co espazo histórico da Casa do Cabido, nunha experiencia inmersiva que permitirá ao público asistir ao traballo artístico en tempo real.

Presentación do libro Cantigueiro de Compostela

Xa ás 19.00 horas, o auditorio do Museo do Pobo Galego será escenario da presentación do libro Cantigueiro de Compostela, unha coedición da Editorial Galaxia e o Consorcio de Santiago, con escolma e edición a cargo de Marcos Calveiro e Alba Gil Vicente.

Ao acto asistirán diversas autoridades e responsables institucionais: a alcaldesa de Santiago e presidenta do Consorcio, Goretti Sanmartín Rei; a presidenta do padroado do Museo do Pobo Galego, María Concepción Losada Vázquez; o xerente do Consorcio, José Antonio Domínguez Varela; o director de edicións de Galaxia, Marcos Calveiro; e o responsable de publicacións do Consorcio, Juan Conde Roa.

O volume reúne cantigas vencelladas a Santiago e divídese en dúas partes: por un lado, as recollidas directamente na cidade, en lugares como Folgoso ou Santa María de Figueiras; e por outro, aquelas que fan referencia directa a Compostela, aos seus mosteiros (de San Martiño a San Francisco), ao Apóstolo, ás súas rúas senlleiras (do Vilar á Calderería), e a lugares tan icónicos como Conxo ou o Pico Sacro.