16º-25º
viernes | 20 junio | 2025
A sociedade municipal Tussa e a startup MOBME, impulsada polo Grupo Castrosua, están a traballar conxuntamente no deseño dun proxecto piloto de micromobilidade urbana que buscará ofrecer alternativas sostibles e prácticas ao vehículo privado en Santiago de Compostela. Trátase dunha proposta innovadora que parte dun estudo de análise e diagnose en marcha, e que será presentado en próximas datas a distintos axentes institucionais e empresariais para avaliar a súa viabilidade.
Segundo explicou o concelleiro de Mobilidade, Xan Duro, o proxecto nace da colaboración público-privada entre Tussa e MOBME, e aposta por un novo modelo de mobilidade máis sostible, eficiente e adaptado ás directrices europeas en materia de enerxía e cambio climático. O xerente de Tussa, José Ramón Mosquera, destacou que esta iniciativa recolle algunhas das conclusións do PMUS (Plan de Mobilidade Urbana Sostible), como o feito de que o 80 % dos desprazamentos en coche privado se fan cunha soa persoa a bordo e con traxectos inferiores a 2 quilómetros.
Pola súa parte, o xerente de MOBME, Carlos Gustavo García, destacou que a startup é o reflexo do espírito innovador de Castrosua e da súa aposta pola mobilidade conectada, compartida e accesible, con especial atención ao deseño de solucións urbanas que reduzan o impacto do tráfico tradicional.
Un dos elementos centrais do modelo proposto é o Neno, un vehículo eléctrico ultracompacto fabricado integramente polo Grupo Castrosua, que ocupa menos de 2 m² de superficie, permite levar dúas persoas en paralelo, conta con máis de 180 litros de carga, e pode ser conducido desde os 15 anos con carné de ciclomotor.
Este vehículo está pensado para reducir a ocupación do espazo público, minimizar a conxestión urbana e facilitar desprazamentos curtos. Onde aparca un coche convencional, poderían estacionar ata catro Nenos, apuntan desde MOBME.
O proxecto prevé que se poña en marcha unha flota piloto de vehículos Neno, dispoñibles para particulares, empresas e institucións. O seu funcionamento sería similar ao dos sistemas de bicicletas compartidas: as persoas usuarias poderían recoller un Neno nun punto e deixalo noutro, con plazas de aparcadoiro reservadas e gratuítas en cada unha das zonas definidas na matriz de mobilidade urbana do estudo. As empresas poderían contar con vehículos asignados en exclusiva.
A diagnose realizada por Tussa e MOBME divide o mapa de Santiago en tres grupos de zonas segundo as súas necesidades de mobilidade:
O proxecto enmárcase no convenio asinado pola alcaldesa Goretti Sanmartín, como presidenta de Tussa, e Beatriz Castro, CEO de Castrosua, que define unha liña de colaboración estable para buscar solucións innovadoras de mobilidade alternativa, orientadas a mellorar a calidade de vida da veciñanza compostelá.
