O Centro Singular de Investigación en Tecnoloxías Intelixentes da USC (CiTIUS) volverá abrir as súas portas ao sector produtivo este venres, 4 de xullo, cunha nova edición de Inside the Lab, a xornada anual de transferencia de coñecemento que conecta a investigación do centro coa empresa, a administración e outras organizacións interesadas en proxectos de I+D, licenzas tecnolóxicas ou asociacións estratéxicas.

O evento terá lugar entre as 10.00 e as 14.00 horas nas propias instalacións do CiTIUS. A participación é de balde pero require inscrición previa antes das 12.00 horas do xoves 3 de xullo a través da web oficial do evento.

De intelixencia artificial á tradución automática: 11 demostradores e dúas spin-off

Nesta edición de Inside the Lab presentaranse 11 demostradores tecnolóxicos e 2 spin-off, que amosan o potencial da investigación realizada no centro para xerar valor aplicado en sectores tan diversos como a sanidade, a industria, o medio ambiente ou a cultura.

Entre os proxectos que se poderán coñecer en detalle están:

•  SAIA, unha interface para a análise automatizada de imaxes de resonancia magnética en ratas, pensada para facilitar o traballo de equipos biomédicos sen experiencia en programación.
• Chatty, un sistema conversacional que permite interactuar con múltiples modelos de linguaxe ao mesmo tempo, cada un asumindo un rol diferente.

• EmoTrack, unha ferramenta que detecta e visualiza emocións e niveis de estrés en tempo real mediante técnicas multimodais.
• No ámbito da lingua galega, destacarase Carballo, un modelo multilingüe baseado no Proxecto Nós, e un sistema de tradución automática galego-español-inglés baseado en redes neuronais, ambos con aplicacións en educación, medios ou administración electrónica.
• En eidos ambientais, presentaranse solucións de caracterización da biomasa forestal con LiDAR e identificación de especies de algas mariñas mediante imaxe submarina, con interese para o sector agroforestal e mariño.
• No campo da saúde, BreastAnalyser facilitará o diagnóstico automatizado do cancro de mama a través da análise de imaxes inmunohistoquímicas.
• En visión artificial, o centro mostrará avances en detección visual de obxectos con FPGA e detección de eventos con sensores CMOS, capaces de capturar cambios en escena a nivel de píxel.
• Tamén terá un protagonismo destacado energHius, a nova spin-off do CiTIUS centrada na captura de enerxía ambiental con tecnoloxía Nanostart®, que permite alimentar dispositivos do Internet das Cousas (IoT) sen baterías.

• Por outra banda, Situm, a spin-off máis veterana do centro, participará con GAIA by Situm, unha plataforma intelixente enmarcada no proxecto IA360 que ofrece información xeoespacial en tempo real adaptada a profesionais.

Un broche tecnolóxico e artístico

A xornada incluirá tamén unha experiencia inmersiva co proxecto Esencia, unha instalación dixital interactiva que visualiza o corpo humano como un campo enerxético dinámico, simulado mediante partículas que reaccionan segundo parámetros físicos en tempo real. Un peche artístico e tecnolóxico para unha cita que pretende consolidar pontes entre a investigación universitaria e o tecido produtivo galego e internacional.