16º-27º
viernes | 8 agosto | 2025
A exposición "Traxes e cores de Galiza. A identidade nacional na plástica de Castelao" percorre o seu último tramo este agosto. A mostra, que amosa a rica e importante presenza da indumentaria galega na obra pictórica e gráfica de Alfonso Daniel Rodríguez Castelao, abriu as súas portas a principios de xullo e pecharaas o día 30 deste mes. Para poder vela o horario é de luns a sábado, de 11.00 a 14.00 e de 17.00 a 20.30 horas, no colexio de Fonseca.
Máis de 50 manequíns recubertos en liño do país, con base de madeira e brazos articulados, mostrarán reproducións fidedignas de traxes tradicionais galegos que aparecen nos óleos, acuarelas, gravados e bosquexos de Castelao. Cada manequín irá acompañado de utensilios e antigüidades para completar a escena a representar.
A exposición contará tamén con reproducións da obra gráfica de Castelao en diferentes formatos e tamaños, ourivería tradicional, paneis con información das obras expostas e dos traxes amosados, vitrinas con material gráfico e documental relacionado coas pezas do corpus expositivo, así como un audiovisual para a proxección na sala.
