Ames xa está de festa. Este venres comezou oficialmente o programa “Ames en Festas 2025”, que durante dez días consecutivos —do 1 ao 10 de agosto— encherá de música, cultura popular e actividades para todos os públicos as rúas de O Milladoiro e Bertamiráns, os dous principais núcleos do concello.

O cartel, organizado polo Concello de Ames en colaboración coas comisións de festas da Madalena e da Peregrina e coa área de Xuventude, ofrece unha completa programación que integra orquestras, concertos, pasarrúas, festas infantís, romarías e djs, apostando tamén por propostas emerxentes e música en galego.

Millarock abre o programa e a Madalena toma o relevo

A festa comezou este venres co festival Millarock, que celebrou a súa décimo cuarta edición cunha tarde de obradoiros a cargo de “A Casa do Rock” e as actuacións de Battosai, Ulex e Ruxe Ruxe.

O sábado 2 de agosto arrancan as festas da Madalena no Milladoiro, que se estenderán ata o martes 5. Entre os nomes máis destacados figuran Os Satélites, París de Noia, América de Vigo, Olympus ou Kike Varela, ademais de pasarrúas, procesións e sesións de discoteca móbil.

Bertamiráns toma o relevo coa Peregrina

Do 6 ao 10 de agosto, a festa trasladarase a Bertamiráns para celebrar as festas da Peregrina, cun cartel que inclúe Panorama, Cinema, Metrópolis, Compostela ou Charleston Big Band, así como o concerto de Mondra, a sesión vermú da orquestra Compostela e o pregón de peche, que será ofrecido por Ronald Rojas, migrante venezolano afincado en Ames.

Novidades: festival emerxente, romaría urbana e accesibilidade

Entre as grandes novidades deste ano destaca o Festival Emerxente, que terá lugar o 7 de agosto no parque do Ameneiral, e ofrecerá unha plataforma para que artistas mozos do concello presenten os seus proxectos en directo.

Tamén se celebrará unha nova edición da Romaría Urbana o sábado 9 no Ameneiral, con sesión vermú, concertos de Luis Fercán, Monoulious Dop, Arde ou Tabernarias, obradoiros, inchables e postos de comida, todo nun ambiente festivo pensado para incentivar o consumo local.

Outro dos puntos fortes do programa é a súa aposta pola inclusión: durante todas as xornadas haberá horarios de atraccións sen ruído (de 19.00 a 21.00 horas), mochilas vibratorias para persoas con discapacidade auditiva no Millarock, e plataformas elevadas con rampla para persoas con mobilidade reducida.

Os máis pequenos tamén terán o seu espazo

A programación tamén reserva espazo para os nenos e nenas, con festas infantís gratuítas o 5 de agosto no Milladoiro e o 9 en Bertamiráns, con inchables, festa da escuma, música e xogos, nun horario de 18.00 a 21.00 horas.