A volta ao cole chega tamén ao Espazo Apego, que este mes de setembro retoma a súa actividade cunha programación centrada na escola en galego. O espazo municipal, concibido como lugar de encontro para compartir experiencias e emocións a través da lingua, ofrecerá propostas semanais dirixidas a familias con crianzas de 0 a 6 anos.

Merendolas, contos e experimentación

Os luns será a quenda de A lingua medra, un espazo no que cada semana se abordará un enfoque diferente: cociña con Merendolas, psicomotricidade con Movéndonos con Apego e pequenas experiencias científicas en Experimentamos. As sesións celebraranse de 17.00 a 19.00 horas para crianzas de 2 a 6 anos.

Os martes chegarán as Tardes de contos, que permitirán ás máis pequenas mergullarse no mundo da narración. Haberá dous turnos: de 17.00 a 18.00 horas para nenas e nenos de 0 a 3 anos e de 18.15 a 19.15 horas para o grupo de 3 a 6 anos.

Os mércores, a proposta será Enredando e lingoretando, con xogos guiados ou libres en galego, deseñados para fomentar a socialización e a cooperación. Neste caso organizaranse dous grupos: de 3 a 6 anos sen acompañamento e de 0 a 3 coa presenza dunha persoa adulta de referencia. O horario será de 17.00 a 19.00 horas.

Espectáculos con Marta Ortiz, Brais das Hortas e Sole Felloza

A programación de Tachán!, que se celebra dous xoves ao mes, traerá este setembro dúas citas especiais. O 11 de setembro, a narradora Marta Ortiz e o filólogo Brais das Hortas presentarán Onde nace a lingua, un espectáculo que combina narración oral, xogos fonéticos, cantos e trabalinguas para asentar a lingua en idades temperás.

O 25 de setembro será a quenda de Sole Felloza con Contiños e xogos de Lup, unha proposta para crianzas de 0 a 4 anos que inclúe contos, xogos de dedos, adiviñas e cantigas tradicionais.

Inscricións previas

Todas as actividades requiren inscrición previa, que se formaliza cubrindo un formulario específico. O día anterior á actividade, arredor das 12.00 horas, as familias recibirán un correo coa confirmación da praza. No caso das sesións dos luns, a confirmación chegará o venres anterior, unha vez pechado o prazo de inscrición.