A escena musical galega recibe este venres 5 de setembro unha das súas colaboracións máis agardadas: De Ninghures e Ortiga lanzan RosaLinda, o seu primeiro tema gravado conxuntamente no estudio. A canción, que estará dispoñible nas principais plataformas dixitais desde as 00.00 horas, chega como unha peza bailable e luminosa, que destila a calor das noites estivais.

O sinxelo vén acompañado dun videoclip dirixido por Lorenzo Negueruela, creador habitual nos proxectos audiovisuais de ambas as formacións, que se poderá ver na canle de Youtube de De Ninghures.

Un encontro de estilos

Descrita como o resultado do encontro entre as “raíñas das feiras” e o “rei das verbenas”, RosaLinda conserva os sinais de identidade de De Ninghures e Ortiga, ofrecendo unha mestura de amor, ritmo e frescura en cada compás.

De Ninghures, unha das bandas de referencia da actual escena galega, destaca pola súa capacidade de actualizar a música tradicional con influencias latinoamericanas e magrebís, mesturando coplas populares con novos ritmos. En febreiro deste ano publicaron Feira, un disco no que reinterpretan o espírito das feiras galegas desde unha mirada contemporánea.

Pola súa parte, Ortiga continúa a consolidar o seu papel como figura esencial da música de verbena e pop mestizo, sumando agora esta colaboración que promete converterse nun dos lanzamentos máis comentados do final do verán.