16º-27º
miércoles | 6 agosto | 2025
O campus universitario de Santiago de Compostela volve converterse un verán máis nun espazo de conciliación, aprendizaxe e diversión para centos de familias. O Verán CampUSC, programa impulsado pola Fundación USC coa colaboración do Concello de Santiago, ofrece durante os meses de xuño, xullo e setembro unha ampla oferta de actividades lúdicas e deportivas para nenos e nenas, sempre dende unha perspectiva educativa, igualitaria e inclusiva.
Con máis dunha década de traxectoria, Verán CampUSC é un programa pioneiro no ámbito universitario galego que reflicte o compromiso social da USC coa súa comunidade e coa cidadanía en xeral. Nesta edición, serán 500 rapaces e rapazas os que participen nas distintas quendas, distribuídas entre xuño, xullo e setembro, ocupando espazos deportivos e naturais do campus e de outros puntos da cidade.
As actividades están deseñadas con criterios psicopedagóxicos e de perspectiva de xénero, co obxectivo de fomentar a práctica deportiva autónoma, respectuosa e duradeira. A USC aposta así por un modelo de lecer educativo que favoreza a igualdade entre nenos e nenas dende a infancia.
O programa inclúe unha ampla variedade de actividades deportivas: dende as disciplinas clásicas do atletismo ata deportes de equipo como baloncesto ou voleibol, así como outras prácticas alternativas como ultimate, colpbol ou quidditch. Tamén se recuperan os xogos tradicionais, contribuíndo a preservar o patrimonio lúdico galego.
Ademais do deporte, o Verán CampUSC incorpora obradoiros artísticos e actividades de autocoñecemento, pensadas para potenciar as habilidades persoais e sociais da rapazada. E como non podía faltar nun campus universitario rodeado de natureza, tamén se programan saídas de sendeirismo, carreiras de orientación e descubertas ambientais nos arredores.
Con iniciativas como esta, a Universidade de Santiago reafírmase como unha institución aberta, comprometida e implicada no benestar das familias e no desenvolvemento educativo da infancia.
