14º-21º
sábado | 30 agosto | 2025
O Concello de Rois aposta un ano máis pola dinamización cultural e social do municipio durante os meses de verán. A través do programa ‘Verán en Rois’, presentou unha completa axenda de actividades para xullo e agosto, con propostas pensadas para todas as idades e repartidas entre diversas parroquias. A iniciativa combina contacontos, música, teatro, maxia, deporte e tradición popular, e conta co apoio da Deputación da Coruña e da Xunta de Galicia, a través dos programas Cultura no Camiño e FalaRedes, ademais da iniciativa municipal Cultura Dispersa.
O calendario arrinca este sábado 5 de xullo coa XVII Andaina por parellas, organizada en colaboración co colectivo Remonte. A saída terá lugar ás 19.30 horas desde o polideportivo de Rois. A partir de aí, sucederanse espectáculos musicais e infantís como O Rianxeiro, con Verónica Santalices (día 8), ou Peque disco Moc Moc e Picadiscos María Faltri (día 11), ademais de propostas de contacontos como Zona en obras, de Brais das Hortas (día 15).
A música e a festa chegarán tamén da man da Charanga Os Celtas en Ribasar (día 18), da disco móbil Chocolate en Herbogo (día 19) e da maxia do Mago Teto (día 31), nunha programación que non esquece o humor, a narración oral ou o teatro de rúa, como Por que é salgada a auga do mar?, de Os Quinquilláns.
En agosto, o protagonismo será compartido entre o deporte popular, con eventos como o XIX Torneo Interparroquial de fútbol 7 (día 2), e as verbenas e sesións vermú das diferentes parroquias: a disco Chocolate chegará a Leroño (día 15), o Dúo Stylo animará Urdilde (día 16) e Os Xeitosos de Trazo estarán en Oín (día 17).
A programación cultural continuará con espectáculos como A Corva, da compañía A Cova das Letras (día 8), ou O lobo feliz, de Miguel Guido (día 14). O punto final do ciclo será o venres 22 de agosto, co espectáculo Un saco de contos, no que Ángeles Goás presentará historias saídas dun saco máxico no campo da festa de Rois.
