17º-18º
sábado | 30 agosto | 2025
O Biopolo Sionlla recibiu esta semana a un grupo de participantes do programa Xuventude Mentoring na Empresa 2025, unha iniciativa destinada a fomentar o emprego xuvenil en sectores estratéxicos de Galicia, como o biotecnolóxico. A proposta está impulsada e cofinanciada pola Consellería de Cultura, Lingua e Xuventude da Xunta de Galicia, coa participación do Programa FSE+ Galicia 2021-2027 da Unión Europea, que achega o 60% dos fondos.
En total, son 12 mozas e mozos de entre 18 e 29 anos os que participan nesta edición, con estadías formativas remuneradas de tres meses en diferentes empresas da provincia. O obxectivo é ofrecerlles unha primeira experiencia laboral que lles permita iniciar unha carreira profesional en Galicia e evitar que teñan que buscar oportunidades fóra.
O xerente da Asociación Área Empresarial do Tambre, José Manuel Beceiro, destacou durante a visita que un dos propósitos fundacionais do Biopolo foi precisamente reter o talento xerado na Universidade de Santiago, sobre todo en ámbitos estratéxicos como o da biotecnoloxía. Ademais, puxo en valor a colaboración público-privada que sostén esta iniciativa, na que participan a Xunta, o Concello de Santiago, a Universidade de Santiago de Compostela, a Cámara de Comercio e a Asociación do Tambre, ademais de varios clústeres sectoriais.
Pola súa parte, a secretaria xeral da Cámara de Comercio de Santiago, Rosa Mary Cardeso, subliñou que non se pode permitir que a xuventude formada en Galicia teña que emigrar por falta de oportunidades laborais. “Un mercado laboral xuvenil activo é esencial para o desenvolvemento de Galicia”, sinalou, lembrando que en España a taxa de paro xuvenil ronda o 25%.
Cardeso explicou tamén que a Cámara está a traballar en tres liñas principais: retención e captación de talento novo, capacitación e formación práctica, e conexión fluída entre empresas e mocidade.
As estadías desenvolveranse en compañías de diferentes sectores, entre elas Ozoaqua, Televés, Chemical Gama Verde, Espagat, Acar, Cartogalicia, MK20, Segurma, Rivadulla ou Orballo. A secretaria xeral quixo agradecer ás empresas implicadas a súa participación, destacando o seu papel como motores económicos que xeran emprego e riqueza no territorio.
